ភ្នំពេញ៖ នៅថ្ងៃទី២២ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន នឹងដឹកនាំក្រុមការងារអញ្ជើញចូលរួមក្នុងកិច្ចប្រជុំពិសេសដើម្បីរំលឹកខួបអនុស្សាវរីយ៍លើកទី៣០ នៃទំនាក់ទំនងដៃគូសន្ទនាអាស៊ាន-ចិន។

កិច្ចប្រជុំនោះជាកិច្ចប្រជុំពិសេសរវាងថ្នាក់ដឹកនាំតំបន់អាស៊ានជាមួយនឹងប្រធានាធិបតីសាធារណរដ្ឋចិន លោក ស៊ី ជីនពីង។

យោងតាមសេចក្ដីប្រកាសព័ត៌មានរបស់ក្រសួងការបរទេសឲ្យដឹងថា៖ «ថ្នាក់ដឹកនាំអាស៊ាន និងលោក ស៊ី ជីនពីង រំពឹងថានឹងពិភាក្សាអំពីទិសដៅអនាគត និងរិះរកមធ្យោបាយ ដើម្បីពង្រឹងពង្រីកទំនាក់ទំនងអាស៊ាន-ចិន បន្ថែមទៀត និងធ្វើការផ្លាស់ប្ដូរយោបល់គ្នាលើបញ្ហាតំបន់ និងអន្តរជាតិដែលជាចំណាប់អារម្មណ៍ និងការបារម្ភរួម»។

ទំនាក់ទំនងរវាងអាស៊ាននិងចិន ចាប់ផ្តើមកាលពីក្នុងខែកក្កដា ឆ្នាំ១៩៩១ ដោយបានជួយគ្នាទៅវិញទៅបង្កើននូវទំហំពាណិជ្ជកម្មទ្វេភាគីបានកើនឡើងជាបន្តបន្ទាប់ពីតិចជាង ៨ប៊ីលានដុល្លារអាមេរិក ក្នុងពេលទំនាក់ទំនងជាដំបូងរហូតកើនដល់ជាង ៦៨០ប៊ីលានដុល្លារអាមេរិកកាលពីឆ្នាំ២០២០។ ដោយមានគ្រឹះរឹងមាំបែបនេះ ភាគីទាំងពីរបានសន្យាបង្កើនកិច្ចសហប្រតិបត្តិការលើគ្រប់វិស័យដើម្បីបើកទំព័រថ្មីក្នុងការអភិវឌ្ឍ និងវិបុលភាពរួមរវាងអាស៊ាន-ចិនបន្ថែមទៀត៕